Трамп АҚШнинг Исроилдаги элчисидан келган мактубни эълон қилди
Мактуб эълон қилиниши ортидан айрим таҳлилчилар АҚШ ташқи сиёсатида диний қарашларнинг роли масаласи муҳокама қилинаётганини қайд этмоқда.
АҚШ президенти Доналд Трамп ўзига юборилган мактубни жамоатчиликка эълон қилди. Мактуб муаллифи — АҚШнинг Исроилдаги элчиси Майкл Ҳакаби.
Эълон қилинган мактубда элчи Трампни муҳим тарихий қарорлар қабул қилган етакчи сифатида таърифлайди. Шунингдек, унда Трампнинг сиёсий фаолияти диний мазмундаги иборалар билан ҳам тавсифланган. Хусусан, элчи айрим жумлаларда Трамп қарорлари илоҳий ирода билан боғланиши ҳақидаги фикрларни билдирган.
Ҳакабининг ёзишича, у Исроилдаги фаолияти давомида АҚШ манфаатларини ҳимоя қилиш ва Вашингтоннинг позициясини етказиш вазифасини бажаради. Мактубда у ўзини Трампнинг “кўзи, қулоғи ва овози” сифатида таърифлайди.
Мактуб эълон қилиниши ортидан айрим таҳлилчилар АҚШ ташқи сиёсатида диний қарашларнинг роли масаласи муҳокама қилинаётганини қайд этмоқда. Хусусан, АҚШнинг Исроилдаги элчихонасини Қуддусга кўчириш қарори ҳам рамзий қарор бўлгани келтирилган.
"Биз АҚШнинг Яқин Шарқдаги ташқи сиёсати тобора кўпроқ давлат манфаатларига эмас, балки тор доирадаги диндор гуруҳларнинг эътиқодларига асосланаётганининг гувоҳи бўляпмиз", дейилади эълон қилинган таҳлилда.
