Трамп Эроннинг “сўзсиз таслим бўлишини” талаб қилди

АҚШ президенти Дональд Трамп Қўшма Штатлар Эрон билан фақат унинг тўлиқ ва шартсиз таслим бўлиши шарти билан келишув тузиши мумкинлигини маълум қилди. Бу ҳақда у Truth Social ижтимоий тармоғидаги саҳифасида ёзган.

 

Трампнинг таъкидлашича, АҚШ учун Эрон билан шартсиз таслим бўлишдан бошқа ҳеч қандай келишув варианти мавжуд эмас.

 

Унинг сўзларига кўра, Эрон таслим бўлгач ва мамлакатда “буюк ҳамда мақбул раҳбар ёки раҳбарлар” сайлангач, АҚШ ҳамда унинг иттифоқчилари Эронни оғир вазиятдан чиқаришга ёрдам беради.

 

“Шундан сўнг биз ва бизнинг жасур иттифоқчиларимиз Эронни ҳалокат ёқасидан қайтариш, уни иқтисодий жиҳатдан янада ривожлантириш учун тинимсиз ишлаймиз. Эроннинг буюк келажаги бор”, — дея ёзган АҚШ президенти.

 

Эслатиб ўтамиз, 28 феврал куни АҚШ ва Исроил томонидан Эронга қарши ҳарбий операция бошланган эди. Аввалроқ Трамп Вашингтоннинг Эрон билан ядровий келишув бўйича музокараларда “сабри тугаганини” ҳам билдирган.