Туркия 20 мартгача Эронга авиатранспорт рейсларини бекор қилди
БАА, Қатар, Қувайт ва Баҳрайнга парвозлар ҳам номаълум муддатга тўхтатилган.
Минтақадаги хавфсизлик вазиятининг кескинлашуви сабаб Туркия авиакомпаниялари Яқин Шарқнинг бир қатор давлатларига амалга ошириладиган рейсларни вақтинча тўхтатди.
Turkish Airlines, AJet, Pegasus Airlines ҳамда SunExpress авиакомпаниялари Эрон, Ироқ, Сурия, Ливан ва Иордания йўналишларидаги парвозларни камида 9 мартга қадар бекор қилган.
Бу ҳақда Туркиянинг транспорт ва инфратузилма вазири Абдулкадир Уралоғлу маълум қилди. Унинг сўзларига кўра, айрим йўналишлар бўйича чекловлар бундан ҳам узоқ муддат давом этиши мумкин.
Хусусан, Pegasus авиакомпанияси Эронга парвозларни 12 мартгача тўхтатган бўлса, Turkish Airlines компанияси мазкур йўналишдаги рейсларни 20 мартга қадар бекор қилган.
Бундан ташқари, турк авиакомпанияларининг БАА, Қатар, Қувайт ва Баҳрайн йўналишларига амалга ошириладиган парвозлари ҳам номаълум муддатга тўхтатилган. Ушбу рейсларни тиклаш бўйича қарор минтақадаги вазиятдан келиб чиқиб қабул қилинади.
Вазирнинг маълум қилишича, ҳозирда Туркия аэропортларида Ироқ авиакомпаниясига тегишли еттита самолёт қолиб кетган. Шунингдек, Туркия авиакомпанияларининг учта самолёти Ироқ ва Эрон ҳудудида қолмоқда.
Шу билан бирга, Turkish Airlines компанияси Истанбул ва БАА шаҳарлари орасидаги рейсларни қайта тиклаш муддатини ҳозирча эълон қилмаган. Авиакомпания сотиб олинган чипталар бўйича рейслар бекор қилинганини маълум қилган.
