Ўзбекистон–Венгрия учинчи ректорлар форуми: Икки томонлама ҳамкорлик шартномалари имзоланди

Самарқанддаги “Ипак Йўли” Туризм ва Маданий Мерос Халқаро Университетида “Рақамли даврда олий таълим: сунъий интеллект, ин моделлар ва глобал рақобатбардош университетлар” мавзусида Ўзбекистон–Венгрия учинчи ректорлар форуми бўлиб ўтди.

Форумда Ўзбекистон Республикаси Олий таълим, фан ва инновациялар вазири Қўнғиротбой Шарипов, Венгрия Ректорлар конференцияси президенти Бела Меркели, Венгриянинг Ўзбекистондаги Фавқулодда ва Мухтор элчиси Ёжеф Рожа, Обуда университети ректори Левенте Ковач, шунингдек, икки мамлакатнинг етакчи олий таълим ташкилотлари раҳбарлари ва соҳа вакиллари иштирок этди.

Маълумотларга кўра, Ўзбекистон ва Венгрия ўртасидаги таълим ва илм-фан соҳасидаги ҳамкорлик 2017 йилда имзоланган ҳукуматлараро битим асосида ривожланмоқда. Ҳозирги кунда Ўзбекистоннинг 50 дан ортиқ олий таълим муассасалари Венгриянинг 30 дан зиёд университет ва илмий-таълим ташкилотлари билан 100 га яқин ҳамкорлик шартномалари асосида фаолият юритмоқда. Шунингдек, 17 та қўшма стартап лойиҳалари амалга оширилмоқда.

Форум доирасида таълим тизимига сунъий интеллект технологияларини жорий этиш, инновацион таълим моделлари яратиш, университетлараро илмий тадқиқотлар, қўшма лабораториялар ташкил этиш ва “университет–саноат” ҳамкорлигини кучайтириш масалалари муҳокама қилинган.

Тадбирда ялпи мажлис ва бир нечта параллел сессиялар ўтказилиб, икки мамлакат ректорлари ва экспертлари замонавий олий таълимни ривожлантириш, инновациялар ва стартапларни қўллаб-қувватлаш ҳамда ёшларнинг илмий фаоллигини ошириш бўйича тақдимотлар қилган.

Форум дастурининг якуний қисмида Ўзбекистон ва Венгрия олий таълим муассасалари ўртасида эришилган келишувлар асосида икки томонлама ҳамкорлик шартномаларини алмашиш маросими бўлиб ўтди. Ушбу келишувлар қишлоқ хўжалиги, муҳандислик, ахборот технологиялари, сунъий интеллект, энергетика, тиббиёт ва педагогика соҳаларида қўшма таълим ва илмий тадқиқот лойиҳаларини амалга оширишга хизмат қилиши айтилмоқда.