Андижонда йигитнинг суратларини тарқатмаслик эвазига пул талаб қилган аёллар қўлга олинди
Улар TikTok орқали танишган шахснинг фотосуратларини ўчириш эвазига 20 000 АҚШ доллари талаб қилган.
Андижон вилояти Ички ишлар бошқармаси тезкор-қидирув хизмати ва Давлат хавфсизлик хизмати ҳамкорлигида олиб борилган тезкор тадбирда икки нафар аёлнинг жиноий ҳаракатларига чек қўйилди. Аниқланишича, 2001 йилда туғилган аёл ўзини олдиндан таниш бўлган, Тошкентда яшовчи 1999 йилда туғилган аёл билан олдиндан жиноий тил бириктирган.
Улардан бири TikTok ижтимоий тармоғи орқали Андижон туманида яшовчи 2002 йилда туғилган йигит билан танишиб, ишқий муносабат ўрнатган. Шундан сўнг, жабрланувчининг шахсига оид фотосуратлар устига турли уятли ва ҳақоратли сўзлар ёзиб, ушбу материалларни ўчириб ташлаш эвазига 20 000 АҚШ доллари талаб қилишган.
Тезкор тадбир давомида гумонланувчилар келишилган маблағнинг бир қисмини – 7 000 долларни банк пластик картасига ўтказаётган вақтда ашёвий далиллар билан қўлга олинган.
Мазкур ҳолат бўйича Ўзбекистон Республикаси Жиноят кодексининг 165-моддаси 3-қисми “а” банди билан жиноят иши қўзғатилган бўлиб, тергов ҳаракатлари олиб борилмоқда.
