Россия Эронга АҚШ кучлари ҳақида разведка маълумотларини тақдим қилмоқда, Хитой эса молиявий ёрдам бермоқчи
Қўшма Штатлар мудофаа вазири АҚШ-Исроил ва Эрон урушида Россия билан Хитой муҳим рол ўйнамаётганини билдирган.
Россия Эронга АҚШ қўшинлари, кемалари ва самолётларининг жойлашуви, ҳаракатлари ҳақида разведка маълумотларини тақдим этмоқда. Бу ҳақда АҚШ разведкасига алоқадор манбаларга таяниб CNN хабар берди.
Қайд қилинишича, Россиянинг ушбу ҳаракатлари Москвани урушга аралашишга уринаётгани ҳақидаги биринчи белги сифатида баҳоланмоқда.
Манбалардан бири Россия Эрон билан бўлишган разведка маълумотларининг катта қисми Москвадаги илғор сунъий йўлдош тизимларидан олинган тасвирлар бўлганини айтмоқда. Бундай ёрдамлар эвазига Россия Эрондан нимани олиши эса номаълум.
CNN Кремль ва Вашингтондаги Россия элчихонасидан мазкур ҳолат бўйича изоҳ сўраган.
Шунингдек, қайсидир Эрон ҳужуми айнан Россия тақдим этган разведка маълумотларига асослангани ҳозирча исботланмаган. Бироқ сўнгги кунларда бир нечта Эрон дронлари АҚШ қўшинлари жойлашган ҳудудларга ҳужум қилган. Жумладан якшанба куни Эрон дрони АҚШ аскарлари вақтинча жойлашган Кувайтдаги бинога зарба бериб, олти америкалик ҳарбийни ҳалок қилган.
Манбаларга кўра, АҚШда Хитойнинг Эрон учун молиявий ёрдам, эҳтиёт қисмлар ва ракета компонентларини тақдим этишга тайёрланаётгани ҳақидаги разведка маълумотлари мавжуд.
Шу билан бирга, Пекин ҳозиргача урушда тўғридан-тўғри иштирок этмаяпти. Хитой Теҳронни Ҳўрмуз бўғозидаги кемаларнинг хавфсиз ҳаракатни таъминлашга ундаётгани айтилмоқда.
Манбалардан бири Эрон нефти Хитой учун жуда муҳимлигига ишора қилиб: “Хитой қўллаб-қувватлашда эҳтиёткорроқ. Улар урушнинг тугашини хоҳлайди, чунки можаро уларнинг энергия таъминотига таҳдид солади”, — деди.
АҚШ разведка хизмати изоҳ беришни рад этди. CNN Хитой элчихонасидан ҳам Эронни қўллаш бўйича тайёргарлик ҳақида изоҳ сўраган.
АҚШ мудофаа вазири Пит Ҳегсет эса чоршанба куни журналистларга Россия билан Хитой АҚШ-Исроил ва Эрон урушида муҳим роль ўйнамаётганини билдирган.
Маълумот ўрнида, сўнгги уч йил давомида Россия ва Эрон ракета, дрон технологияси соҳасида ҳамкорлик қилмоқда. Эрон Россияга Shahed дронлари ва қисқа масофали баллистик ракеталарни етказиб, уларни Украинага қарши ишлатишда ёрдам берган, Россияда Эрон дизайнидаги дронларни ишлаб чиқарадиган катта завод ташкил қилишда ҳам ёрдам кўрсатган. Эрон эса ўз навбатида Россиядан ядро дастурини ривожлантиришда ёрдам сўраган.
CENTCOM қўмондони адмирал Брад Купер ҳозирги вақтда АҚШнинг Эронга қарши операцияси 50,000 дан ортиқ қўшин, 200 дан ортиқ жанговар самолёт ва икки авиация кемасини ўз ичига олишини маълум қилди.
Эронга қарши ҳарбий ҳаракатлар қанча давом этиши ҳақида аниқ маълумотлар йўқ.
