Россия Украинага дрон ва ракеталар билан ҳужум қилди: Харкивда камида етти киши ҳалок бўлди
Россия Украина бўйлаб энергетика сектори ва темирйўл инфратузилмасини нишонга олган.
Шанба куни кечаси Россия Украина ҳудудига дронлар ва ракеталар билан оммавий ҳужум уюштирди. Бу ҳақда Украина расмийларига таяниб, Reuters хабар бермоқда.
Маълум қилинишича, ҳужумлар оқибатида инфратузилма зарар кўрган ҳамда Украинанинг шимолий-шарқидаги Харкив шаҳрида камида етти киши, жумладан икки нафар бола ҳалок бўлган.
Украина президенти Володимир Зеленский Россия мамлакат бўйлаб энергетика сектори ва темирйўл инфратузилмасини нишонга олиб, 480 та дрон ва 29 та ракета учирганини айтди.
“Ҳаётга қарши қаратилган бундай ваҳшиёна зарбаларга ҳамкор давлатлар томонидан жавоб бўлиши керак”, — деди Зеленский Тelegram-каналида.
Зеленскийнинг таъкидлашича, Россия Украинанинг турар жойлари ва муҳим инфратузилмасини йўқ қилишга қаратилган уринишларидан ҳамон воз кечмаган. Шу боис у ҳамкор давлатларни ҳаво мудофааси тизимлари ва қурол-яроғ етказиб беришни давом эттиришга чақирди.
Украина ҳаво кучлари маълумотига кўра, ҳаво мудофааси бўлинмалари 453 та дрон ва 19 та ракетани уриб туширган. Шунга қарамай, Россия томонидан учирилган 9 та ракета ва 26 та ҳужумчи дрон 22 та объектга зарба берган.
