Қўшма Штатлар Россия нефтига қўйилган айрим санкцияларни юмшатиши мумкин — АҚШ молия вазири
Вашингтон Эрон атрофидаги кескинлик фонида жаҳон нефть бозоридаги вазиятни барқарорлаштириш чораларини кўриб чиқмоқда.
Исроил ва АҚШнинг Эрон билан уруши туфайли жаҳон нефть бозорида юзага келган кескин вазият сабаб, Вашингтон Россия нефтига нисбатан айрим санкцияларни юмшатиши мумкин. Бу ҳақда АҚШ молия вазири Скотт Бессент Fox News телеканалига берган интервьюсида маълум қилди.
Вазирнинг айтишича, Исроил ва АҚШнинг Эрон билан можароси фонида жаҳон нефть бозорида кескин вазият юзага келган. Шу сабабли бозорга қўшимча нефть чиқариш орқали таклифни ошириш масаласи муҳокама қилинмоқда.
“Денгизда Россиянинг юзлаб миллион баррел хом нефти ортилган танкерлар турибди. Агар уларни санкциялардан озод қилсак, жаҳон бозорига қўшимча таклифни оширишимиз мумкин. Биз бундай имкониятни кўриб чиқяпмиз”, — деди Бессент.
Шунингдек, 6 март куни АҚШ Ҳиндистондаги нефтни қайта ишлаш заводларини Россия нефтини сотиб олишга қўйилган тақиқдан 30 кун муддатга озод қилди. Бу қарор аллақачон танкерга юкланган нефтга нисбатан амал қилади.
Бессентнинг айтишича, Эрон билан уруш фонида нефть бозоридаги вазиятни енгиллаштиришга қаратилган чоралар ҳақида АҚШ ҳукумати бундан кейин ҳам маълумот бериб боради.
