Тошкентда туман ҳокимлиги мансабдорлари пора билан ушланди
Мансабдорлар фуқаронинг турар жой хонадонини нотурар жой сифатида расмийлаштириб бериш учун пул талаб қилган.
Яшнобод тумани ҳокимининг тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича маҳалла фуқаролар йиғинларидан биридаги ёрдамчиси пора сифатида 5 минг долларни олган вақтида ашёвий далиллар билан ушланди. Бу ҳақда Zamon.uz га ДХХ маълум қилди.
Маълум қилинишича, ҳоким ёрдамчиси тадбиркорлик билан шуғулланмоқчи бўлган фуқаронинг кўп қаватли уйнинг 1-қаватидаги турар жой хонадонини нотурар жой тоифасига ўтказишга юқори лавозимда ишловчи танишлари орқали рухсат олиб бериш ва тегишли ҳужжатларини расмийлаштиришда кўмаклашиш эвазига 5 минг доллар талаб қилган.
Терговга қадар текширув давомида, ҳоким ёрдамчиси фуқаронинг ишини ҳал қилиш учун Яшнобод туман ҳокимияти бўлинма раҳбарига ҳам пул бериши аниқланиб, иккинчи мансабдор ҳам 600 доллар пора олаётганда қўлга олинган.
Ҳозирда қонунбузарларга нисбатан Жиноят Кодексининг 168 ва 28,211-моддалари билан жиноят иши қўзғатилиб, "қамоқ" эҳтиёт чораси қўлланилди. Тергов ҳаракатлари олиб борилмоқда.
