Тошкентда яқин уч кун ҳаво сифати ёмонлашиши мумкин

Бугундан бошлаб мамлакат ҳудудига совуқ антисиклон кириб келиши сабабли атмосфера ҳавоси сифати вақтинча ёмонлашиши кутилмоқда. Бу ҳақда “Ўзгидромет” хабар берди.

 

Мутахассислар ҳаво айланишининг сустлашуви ва ҳарорат инверсияси шаклланиши эҳтимоли туфайли ифлослантирувчи моддалар атмосферанинг ерга яқин қатламида тўпланиб боришини билдирган.

 

“Айни пайтда ҳудудда ҳарорат инверсиясига олиб келувчи метеорологик шароитлар кузатилмоқда. Бу кечаси +5…+7°C, кундузи эса +16…+18°C атрофида бўлаётган кескин ҳарорат фарқи билан изоҳланмоқда. Тошкент шаҳри нам ва нисбатан салқин ҳаво массаси таъсирида қолмоқда”, дейилади агентлик хабарида.

 

Таҳлилларга кўра, соатларда туман, юқори намлик ҳамда деярли шамолсиз об-ҳаво кузатилаётгани ҳаво алмашинувининг секинлашишига сабаб бўлмоқда. Натижада чиқиндилар шаҳар ҳудудида сақланиб қолиши мумкин.

 

Мутахассисларнинг таъкидлашича, бундай шароитда шаҳарга хос одатий ифлослантирувчи моддалар — автотранспорт чиқиндилари, иситиш тизимлари, ёқилғи ёқиш жараёни ҳамда саноат чиқиндилари атмосферада тўпланади. Ифлослантирувчи моддалар тарқалишининг сустлиги сабабли ҳавода чанг ва майда дисперсли заррачалар концентрацияси ортиши эҳтимоли бор.

 

Прогнозлар мазкур вазият яқин уч кун давомида сақланиб туриши мумкинлигини кўрсатмоқда. 10 мартга келиб совуқ антисиклон мамлакат ҳудудини тўлиқ қамраб олади. Шундан сўнг ҳаво ҳарорати барқарорлашиши, шамол тезлигининг ошиши ҳамда ёғингарчилик кузатилиши натижасида атмосфера ҳавосидаги ифлослантирувчи моддалар тарқалиши кутилмоқда.