Транспорт вазирлиги Яқин Шарқда сайёҳларни ёрдамсиз қолдирган туроператорларни танқид қилди
Вазирлик маълумотига кўра, эвакуация қилинаётган фуқароларнинг қарийб 95 фоизи ҳудудга пакетли турлар орқали сафар қилган.
Транспорт вазирлиги Яқин Шарқда сайёҳлик сафарида бўлган ўзбекистонликларни қийин вазиятда ёрдамсиз қолдирган туроператор ва агентликлар фаолиятини танқид қилди.
Вазирлик маълумотига кўра, Яқин Шарқдан фуқароларни эвакуация қилиш жараёнида уларнинг қарийб 95 фоизи пакетли турлар орқали ушбу ҳудудга сафар қилгани аниқланган.
Бироқ айрим туроператор ва агентлар мижозлари билан алоқани узиб, уларни зарур ёрдам билан таъминламаётгани қайд этилган. Департамент таъкидлаганидек, айрим операторлар тезкор ва ишончли маълумот бермасдан, ижтимоий тармоқларда турли видеолар тарқатиш орқали жамоатчилик фикрини манипуляция қилмоқда. Шу билан бирга, улар ўз мажбуриятларини бажариш ўрнига сайёҳларни элчихоналар ва консулликлар зиммасига қолдирмоқда.
Вазирлик эслатишича, пакетли сайёҳлик хизматлари одатда меҳмонхонада жойлашиш, авиачипталар, трансфер ва суғурта хизматларини ўз ичига олади. Суғурта полиси шартларига мувофиқ, форс-мажор ҳолатларида йўловчиларнинг турар жойи, транспорти ва эвакуацияси билан боғлиқ барча харажатлар қопланиши керак.
Ҳозирда Яқин Шарқда, хусусан Қатар ҳудудида қолган Ўзбекистон фуқароларини Ар-Рийод халқаро аэропорти орқали эвакуация қилиш бўйича ташкилий чоралар кўрилмоқда.
Вазирликнинг маълум қилишича, Саудия Арабистонидаги Даммам халқаро аэропорти ва Ар-Рийод аэропортларидан халқаро йўналишлар бўйича рейслар чекловсиз амалга оширилмоқда ва чипталар савдоси очиқ. Шунингдек, Жидда ҳамда Мадина шаҳарларига рейслар одатдагидек давом этмоқда.
Транспорт вазирлиги туроператор ва агентликларни форс-мажор ҳолатларида ҳам истеъмолчилар ҳуқуқларини тўлиқ таъминлаш, мижозлар билан доимий алоқада бўлиш ҳамда мавжуд рейслар орқали уларни хавфсиз ҳудудларга эвакуация қилиш чораларини кўришга чақирди.
