Яқин Шарқ давлатларидан 14 мингдан ортиқ ўзбекистонлик қайтарилди — Транспорт вазирлиги
Қайтариш операциялари Яқин Шарқдаги ҳаво ҳудудлари ёпиқ бўлгани сабабли Саудиядаги аэропортлар орқали амалга оширилмоқда.
Транспорт вазирлиги хабарига кўра, Яқин Шарқдаги ҳарбий ҳаракатлар сабабли Баҳрайн, Кувайт, Сурия, Ироқ, Эрон, Қатар ва Исроил ҳаво ҳудудлари ёпиқ бўлиб, Ўзбекистон фуқароларини ватанга қайтариш ишлари давом этмоқда.
Қайд этилишича, 28 февралдан 7 март эрталаб соат 10:00 ҳолатига кўра, Мадина ва Жидда аэропортларидан 63 та парвоз орқали 13 543 нафар, Дубай аэропортидан 9 та парвоз орқали 1 401 нафар фуқаролар олиб келинган. Хорижий авиакомпаниялар орқали жами 1 365 нафар йўловчи эвакуация қилинган, шундан 990 нафарини Ўзбекистон фуқаролари ташкил қилади.
Қатар ҳудудида қолган фуқароларни Саудиянинг Риёз аэропорти орқали олиб чиқиш бўйича ташкилий ишлар давом этмоқда. Фуқароларнинг аксарияти тур пакетлар асосида келган.
Транспорт вазирлиги туроператорлар ва агентларни мажбуриятларини бажаришга, йўловчилар билан мунтазам алоқада бўлишга чақирмоқда. Суғурта полисларига мувофиқ, форс-мажор ҳолатларида барча харажатлар қопланиши шарт.
Шунингдек, хабарда айни вақтда Кувайт, Қатар ва Баҳрайнга яқин бўлган Саудиянинг Даммам ва Риёз аэропортларидан барча халқаро йўналишларда мунтазам авиақатновлар чекловларсиз амалга оширилмоқда ва авиачипталар сотуви амалда мавжудлиги қай этилган.
