АҚШ ҳужумларидан кейин Эрон харитаси ўзгариши мумкин — Трамп
У зарурат туғилса, бойитилган уранни мусодара қилиш учун АҚШ қўшинлари Эронга юборилиши мумкинлигини ҳам истисно этмади.
Доналд Трамп АҚШнинг Эронга қарши ҳужумларидан сўнг мамлакатдаги вазият тубдан ўзгариши мумкинлигини маълум қилди. Бу ҳақда у журналистлар билан мулоқот чоғида баёнот берган.
АҚШ президенти Эроннинг таслим бўлиши эҳтимоли ҳақида гапирар экан, бу ҳатто “Эрон таслим бўлиши ёки қаршилик кўрсатиш имкониятидан маҳрум бўлиши” мумкинлигини айтди.
Шунингдек, Трамп Америка ҳужумларидан кейин Эроннинг сиёсий ва ҳудудий ҳолати ўзгариши эҳтимолини ҳам истисно қилмади. У содир бўлаётган жараённи тасвирлашда бир неча бор “уруш” сўзини ишлатган.
АҚШ раҳбари зарурат туғилса, Америка қўшинларини Эронга юбориш имкониятини ҳам рад этмаган. Унинг сўзларига кўра, бундай қарор “асосли сабаб” бўлган тақдирда қабул қилиниши мумкин. Хусусан, у бойитилган уранни мусодара қилиш учун қўшин юборилиши эҳтимолини тилга олган.
Трамп, шунингдек, курд кучларининг Эрон ҳудудида бўлиши мумкин бўлган операцияларда иштирок этишига қарши эканини билдирган.
“Мен курдларнинг у ерга боришини истамайман. Уларнинг жароҳат олишини ёки ҳалок бўлишини кўришни хоҳламайман”, — деди АҚШ президенти.
