БАА президенти мамлакат “уруш ҳолатида” эканини эълон қилди
Дубайдаги дрон ҳодисалари фонида Амирликларда хавфсизлик чоралари кучайтирилди.
БАА президенти Муҳаммад бин Зайд Ол Наҳаён мамлакат Эрон билан кескинлик фонида “уруш ҳолатида” эканини маълум қилди. Унинг баёноти 7 март куни Амирликлар давлат ахборот воситалари орқали эълон қилинди.
Давлат раҳбари мамлакат қуролли кучларига миннатдорчилик билдириб, улар ушбу оғир вазиятда давлат хавфсизлигини таъминлашда муҳим рол ўйнаётганини таъкидлади.
“Биз уруш ҳолатидамиз. Бу вазият бизга мажбуран юклатилди. Биз ўзимизни, оилаларимизни ва мамлакатимизни ҳимоя қилиш учун ҳаракат қилмоқдамиз”, — деди президент.
Шунингдек, у мамлакатда яшаётган хорижий фуқароларнинг жамият ривожига қўшаётган ҳиссасини ҳам юқори баҳолади.
Аввалроқ, 7 март куни кечқурун Дубай шаҳридаги Marina Tower турар-жой биносига дрон зарбаси берилгани ҳақида хабарлар пайдо бўлди. Расмийлар ҳодиса юзасидан ҳозирча батафсил изоҳ бермаган.
Маълумотларга кўра, Дубайнинг Al Barsha туманида ҳаво мудофааси томонидан тутиб қолинган объект парчаларининг автомобиль устига қулаш оқибатида бир киши ҳалок бўлган.
