Самарқандда Зулфия мукофотини олган шоирага уй совға қилинди
Совға президент топшириғига асосан берилган.
Ўзбекистон Президентининг “Зулфия номидаги Давлат мукофоти билан тақдирлаш тўғрисида”ги қарорига мувофиқ, мамлакатнинг бир гуруҳ фаол ва ташаббускор хотин-қизлари нуфузли мукофот билан тақдирланди.
Мукофот совриндорлари орасида Қашқадарё вилояти Косон туманида яшовчи иқтидорли шоира Латофат Амирова ҳам бор. Ёш ижодкорнинг истеъдоди ва ижодий ютуқлари юқори баҳоланиб, Президент топшириғига асосан унга Самарқанд шаҳрининг Қорасув массивидан икки хонали, барча зарур шароитларга эга ҳамда мебеллар билан жиҳозланган уй топширилди.
Уй калитини топшириш маросимида Самарқанд вилояти ҳокими Адиз Бобоев иштирок этди. Тадбир давомида вилоят раҳбари ёш шоирани эришган ютуқлари билан самимий қутлаб, унга оилавий хотиржамлик ҳамда келгусидаги ижодий фаолиятида улкан муваффақиятлар тилади.
Таъкидланишича, Зулфия номидаги Давлат мукофоти мамлакатда иқтидорли, фаол ва ташаббускор қизларни қўллаб-қувватлаш, уларнинг илм-фан, адабиёт, маданият ва санъат соҳаларидаги ютуқларини рағбатлантиришда муҳим аҳамият касб этади.
