Яқин Шарқдаги юртдошлар хавфсизлиги доимий назоратда — Ўзбекистон дипломатик ваколатхоналари
Ваколатхоналар 24/7 режимида фаолият юритиб, фуқароларга консуллик ёрдам кўрсатмоқда ва махсус @tiv_yordam_bot орқали мурожаатларни тезкор кўриб чиқмоқда.
Ўзбекистоннинг Қўрфаз араб давлатларидаги дипломатик ваколатхоналари Яқин Шарқ минтақасида юзага келган вазиятни доимий равишда кузатиб бормоқда.
Фуқаролардан вазиятга вазмин ва хотиржам муносабатда бўлиш, асоссиз хавотирга берилмаслик сўралмоқда. Ҳозирги вақтда қабул қилувчи давлатлар томонидан барқарорлик ва жамоат хавфсизлигини таъминлашга қаратилган тегишли чора-тадбирлар амалга оширилмоқда.
Ўзбекистон дипломатик ваколатхоналари ва консуллик хизматлари 24/7 режимида фаолият юритмоқда. Фуқаролардан келиб тушган мурожаатлар @tiv_yordam_bot орқали тезкор кўриб чиқилмоқда.
Шунингдек, юртдошларни хавфсиз тарзда Ўзбекистонга қайтариш бўйича чора-тадбирлар доимий назорат остида. Дипломатик ваколатхоналар авиакомпаниялар ва маҳаллий ваколатли идоралар билан ҳамкорликда барча зарур чораларни кўрмоқда.
Фуқаролардан қабул қилувчи давлатларнинг амалдаги қонун ва тартиб-қоидаларига қатъий риоя қилиш, вазиятга оид маълумотларни фақат расмий манбалардан олиш ва тасдиқланмаган хабарларга ишонмаслик тавсия этилади.
