Буюк Британиянинг икки кунлик газ захираси қолди
Энергия бозоридаги узилишлар сабаб Лондон газни юқори нархларда сотиб олишга мажбур бўлмоқда.
Буюк Британияда газ захиралари кескин камайгани маълум қилинди. Бу ҳақда National Gas маълумотларига таяниб Daily Mail нашри хабар берди.
Оператор маълумотларига кўра, Буюк Британия газ омборларида ҳозирда тахминан 6700–7000 гигаватт-соат газ қолган. Бу кўрсаткич бир йил аввалги захиралардан анча паст бўлиб, мамлакатнинг ички эҳтиёжини атиги бир ярим–икки кун давомида қоплашга етиши мумкин.
Нашрнинг ёзишича, мавжуд вазият сабаб Лондон газни халқаро трейдерлардан юқори нархларда сотиб олишга мажбур бўлмоқда. Ҳозирда Буюк Британия Европада табиий газ учун энг юқори улгуржи нарх тўлаётган давлатлардан бири ҳисобланади. Шу билан бирга, бир қатор Европа мамлакатлари бир неча ҳафталик газ захирасига эга бўлгани сабабли таъминотдаги узилишларга тайёр.
Энергетика бозоридаги вазиятга доир фикр билдирган Александр Вучич Европа Россия нефтидан воз кечиш қарори учун юқори нарх тўлаётганини таъкидлаган. Унинг сўзларига кўра, Россия нефтини Осиё, Африка ва Америка давлатлари сотиб олаётган бир пайтда Европа сиёсий сабаблар билан ундан воз кечмоқда.
Шу билан бирга, The Wall Street Journal нашрининг ёзишича, Яқин Шарқдаги кескин вазият фонида Европа давлатлари Россия билан энергетика алоқаларини тиклаш масаласини қайта кўриб чиқиши мумкин. Таҳлилчиларга кўра, сўнгги кунларда айрим энергия танкерлари Европа йўналишидан воз кечиб, Осиё бозорларига йўналтирилган.
Аввалроқ Владимир Путин ҳам Россия учун Европа бозорига газ етказиб беришни тўхтатиб, бошқа ривожланаётган бозорлар билан ҳамкорликни кенгайтириш иқтисодий жиҳатдан фойдалиroq бўлиши мумкинлигини билдирган эди.
