Эроннинг янги Олий раҳбари АҚШ розилигисиз узоқ вақт қолмайди — Трамп

АҚШ президенти Дональд Трамп Эроннинг кейинги Олий раҳбари масаласида баёнот берди. У ABC News телеканалига берган интервьюсида Эрон раҳбари Вашингтонни рози қилиши кераклигини таъкидлаган.

 

“У бизнинг розилигимизни олиши керак бўлади. Агар бундай бўлмаса, у узоқ вақт ҳокимиятда қолмайди. Биз бу масалани ҳар 10 йилда қайта кўриб чиқишга мажбур бўлишни истамаймиз”, — деди Трамп.

 

АҚШ президенти Эроннинг ядровий дастури Вашингтон учун асосий масалалардан бири эканини қайд этган. Унинг сўзларига кўра, АҚШ Эроннинг ядровий қуролга эга бўлишига йўл қўймайди ва бу борадаги хавфсизлик чораларини қатъий назорат қилади. Трамп, шунингдек, зарурат туғилса, уран билан боғлиқ вазиятни назорат қилиш учун Эрон ҳудудига махсус кучлар юбориш эҳтимолини ҳам истисно этмаган.

 

Америка етакчиси шу билан бирга, агар Эрон томонидан мақбул номзод танланса, у Теҳрон режими билан алоқадор бўлган айрим номзодларни ҳам маъқуллаши мумкинлигини айтган. “Агар бу яхши раҳбарни танлашга олиб келадиган бўлса, бундай қилишим мумкин. Бу талабга жавоб берадиган бир нечта одам бор”, — деган у.

 

Трампнинг фикрича, Эрон минтақадаги таъсирини кенгайтиришга ҳаракат қилмоқда. У Теҳрон “бутун Яқин Шарқни эгаллашни режалаштирганини” айтиб, АҚШ ва Исроил томонидан амалга оширилган ҳарбий операциялар бундай режаларни тўхтатишга хизмат қилганини таъкидлади. Шу билан бирга, у ҳарбий операциялар қанча давом этиши ҳақида аниқ муддат айта олмаслигини, бироқ АҚШ ҳарбийлари “режадагидан тезроқ ҳаракат қилаётганини” билдирди.