Самарқандда кадастр ходими, Сурхондарёда собиқ солиқчи пора билан ушланди
Кадастр ходими ер учун кадастр ҳужжатини расмийлаштириб бериш эвазига 2,5 минг доллар, солиқ инспектори фермер масаласини судда ҳал қилиб бериш эвазига 10 млн сўм олаётганда қўлга олинган.
Ҳуқуқни муҳофаза қилувчи органлар томонидан ўтказилган тезкор тадбирлар давомида кадастр ходими ҳамда собиқ солиқ инспекторининг фирибгарлик билан боғлиқ ноқонуний ҳаракатлари аниқланиб, улар қўлга олинди. Бу ҳақда ДХХ Zamon.uz’га хабар берди.
Маълум қилинишича, Давлат хавфсизлик хизмати ҳамда Бош прокуратура ҳузуридаги Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда Давлат кадастрлари палатасининг Пастдарғом тумани филиалида фаолият юритувчи кадастр муҳандиси ноқонуний равишда пул олган вақтида ушланган.
Аниқланишича, у ўзининг ваколатли танишлари орқали маҳаллий фуқарога тегишли 2 сотих ер майдонининг кадастр паспортини давлат рўйхатидан ўтказиб бериш эвазига 2,5 минг АҚШ доллари талаб қилган ва пулни олган вақтида қўлга олинган.
Мазкур ҳолат юзасидан унга нисбатан Ўзбекистон Республикаси Жиноят кодексининг 168-моддаси 3-қисми “в” банди ҳамда 211-моддаси 1-қисми билан жиноят иши қўзғатилиб, қамоқ эҳтиёт чораси қўлланилган.
Шунингдек, Сурхондарёда ўтказилган яна бир тезкор тадбир давомида Давлат солиқ қўмитасининг Шеробод тумани давлат солиқ инспекциясининг собиқ бош инспектори қўлга олинган.
Маълумотларга кўра, у вилоят иқтисодий судида кўриб чиқилаётган иш доирасида боғдорчиликка ихтисослашган фермер хўжалигига нисбатан эгалик ҳуқуқини тиклаб бериш эвазига 10 миллион сўм талаб қилиб, пулни олаётган вақтида ашёвий далиллар билан ушланган.
Мазкур ҳолат юзасидан ҳам Жиноят кодексининг 168-моддаси 3-қисми “в” банди билан жиноят иши қўзғатилиб, гумонланувчига нисбатан қамоқ эҳтиёт чораси қўлланилган. Ҳозирда тергов ҳаракатлари давом этмоқда.
