Саудия Арабистонида турар-жой биносига снаряд тушди: ҳалок бўлганлар бор
Қурбонлар Бангладеш ва Ҳиндистон фуқаролари экани маълум қилинди.
Саудия Арабистонида турар-жой биносига снаряд келиб тушиши оқибатида икки киши ҳалок бўлди, яна 12 киши жароҳат олди. Бу ҳақда қироллик Фуқаролик мудофааси хизмати маълум қилди.
Ҳодиса пойтахт Ар-Риёднинг жануби-шарқида жойлашган Ал-Харж вилоятида содир бўлган. Маълумотларга кўра, техник хизмат кўрсатиш ва тозалаш компаниясига тегишли турар-жой уйига снаряд келиб тушган.
Расмийларнинг билдиришича, ҳалок бўлганлар ҳамда жароҳатланганлар Бангладеш ва Ҳиндистон фуқаролари бўлган. Улар ушбу бинода ишлаш учун келган хорижлик ишчилар сифатида яшаб келган.
Фуқаролик мудофааси хизмати ижтимоий тармоқларда қутқарув ишлари давом этаётганини, қурбонлар сони аниқлаштирилаётганини маълум қилди. Расмийлар ҳудуд аҳолиси ва яқин атрофдагиларни эҳтиёт чораларини кўришга ҳамда шикастланган биноларга яқинлашмасликка чақирди.
Аввалроқ Саудия Арабистони ҳаво мудофааси тизимлари Ал-Харж ҳудуди устида учиб кетаётган қанотли ракета тутилгани ҳақида ҳам хабар берган. Расмий маълумотларга кўра, ракета Саудия Арабистони ҳудудидан учирилган бўлиб, ҳаво мудофааси кучлари томонидан зарарсизлантирилган.
