Тошкентда вояга етмаган ўғилларига машина берган ота 5 суткага қамалди
Ҳужжатсиз автомобил бошқарган болалар сабаб қўшнилар уларнинг отаси билан гаплашмоқчи бўлган, аммо эркак улар билан жанжаллашиб, ҳақорат қилган.
Ижтимоий тармоқларда бир эркак қўшнилари билан тортишиб, улардан бирини ҳақорат қилгани акс этган видео тарқалди. Видеодаги изоҳларга кўра, эркакнинг вояга етмаган ўғиллари — Ҳасан ва Ҳусан автомобилни бир неча бор ҳужжатларсиз бошқаргани айтилган.
Гувоҳларнинг сўзларига кўра, улар маҳалла ҳудудида ҳам автомобилни юқори тезликда ҳайдаган.
Мазкур ҳолат юзасидан Тошкент шаҳар Ички ишлар бош бошқармаси маълумот берди. Қайд этилишича, 7 март куни соат 21:00 атрофида қўшни фуқаролардан бири вазиятни тинч йўл билан муҳокама қилиш ва болаларга танбеҳ беришни сўраш мақсадида фуқаро Нозим Азизовнинг уйига борган.
Бироқ, маълум қилинишича, ота фарзандларини тўхтатиш ўрнига уларни ҳимоя қилган. Гувоҳларнинг айтишича, у қўшни аёлни ҳақорат қилиб, баланд овозда бақирган ва маҳалла аҳолисининг тинчлигини бузган.
Маҳалладаги келишмовчилик юзасидан 102 қисқа рақамига мурожаат қилинган. Воқеа жойига етиб келган ички ишлар ходимлари томонларни бўлимга олиб бориб, ҳолат юзасидан суриштирув ишларини олиб борган.
Суднинг 8 март куни қабул қилинган қарорига кўра, 1981 йилда туғилган фуқаро Нозим Азизовга нисбатан Ўзбекистон Республикаси Маъмурий жавобгарлик тўғрисидаги кодексининг 183-моддаси асосида 5 сутка маъмурий қамоқ жазоси тайинланди.
