Эрон миллий футбол жамоаси мураббийи Австралиядан бошпана сўради, жамоа Эронга қайта олмайди — CNN
Аввалроқ Эрон миллий жамоасининг беш нафар бошқа футболчисига Австралия ҳукумати гуманитар визалар берган эди.
Эрон аёллар футбол жамоаси Австралияни тарк эта олмаяпти, чунки уларнинг Эронга қайтадиган самолётини қабул қиладиган ҳеч бир давлат топилмаган. Бу ҳақда CNN хабар бермоқда.
Жамоа автобуси сешанба куни эрталаб меҳмонхонадан чиқиб, аэропортга йўл олиши ва она юртига учиши керак эди. Бироқ, CNN спорт журналисти Раҳа Пурбахшнинг маълум қилишича, Эрон спортчилари ва жамоа ходимлари ҳозирча Австралияни тарк эта олмаяпти.
Iran International TV телеканалида ишловчи Пурбахш шунингдек, яна икки киши — бир футболчи ва Эрон миллий жамоаси мураббийи ҳам Австралия ҳукуматидан бошпана сўраганини билдирган.
Бундан аввал, Эрон миллий жамоасининг беш нафар бошқа футболчиси ҳам бошпана сўраган бўлиб, Австралия ҳукумати уларга аллақачон гуманитар визалар берган эди.
Эрон аёллар футбол жамоаси Осиё кубогида иштирок этган, бироқ бир ўйиндан олдин мамлакат мадҳиясини ижро этишдан бош тортган. Футболчилар она юртга қайтганда таъқиб қилинишдан қўрқиб Австралиядан бошпана сўраган.
