Эрондаги мактабга АҚШ ракетаси зарба бергани аниқланди
Вашингтон бу ҳалокатли ҳужумга АҚШ жавобгар бўлиши мумкинлигини, аммо мактаб атайин нишонга олинмаганини маълум қилган.
Эроннинг Миноб шаҳридаги қизлар мактабига қилинган ҳужумда АҚШнинг Tomhawk ракетаси ишлатилгани аниқланди. Бу ҳақида видео таҳлилларга таяниб BBC Verify хизмати хабар бермоқда.
Эрон расмийларининг маълум қилишича, ҳужум натижасида 168 киши, жумладан тахминан 110 нафар ўқувчи ҳалок бўлган.
Mehr ахборот агентлиги томонидан эълон қилинган, BBC Verify томонидан ҳақиқийлиги тасдиқланган видеода ракета Минаб шаҳридаги "Шажареҳ Таябеҳ" бошланғич мактаби ёнидаги Эрон Ислом инқилоби қўриқчилари корпуси базасига зарба беришидан олдинги ҳолат акс этган.
BBC Verify илгари сунъий йўлдош тасвирлари, тасдиқланган видеолар ва эксперт таҳлиллари орқали мактаб яқинидаги ҳудудга бир қатор зарбалар берилганини аниқлаган.
Экспертлар сўнгги видео Tomahawk ракетаси билан ҳудудга бир нечта зарбалар берилгани, бу операциянинг АҚШ томонидан амалга оширилганини кўрсатишини айтишган. Экспертлар шунингдек, на Исроил, на Эрон Tomahawk ракетасига эга эмаслигини таъкидлаган.
“Биргина Эрон ракетаси айни вақтда мактабни нишонга олиб, бундай юқори ўлим ҳолатини келтириб чиқариши ҳақиқатдан йироқ”, — деган экспертлар.
Шанба куни АҚШ Президенти Доналд Трамп Эронга тегишли қуроллар аниқ мўлжал олмаслигини айтиб, мактабдаги ҳодисада мамлакатнинг ўзини айблаган эди.
BBC'нинг АҚШдаги ҳамкори CBS'га кўра, Вашингтон бу ҳалокатли ҳужумга АҚШ жавобгар бўлиши мумкинлигини, аммо мактаб мақсадли тарзда нишонга олинмаганини маълум қилган.
Исроил ҳукумати манбаси CBS News'га берган маълумотда, Исроил бу ҳужум ортида эмаслиги ва унинг армияси мактаб яқинида фаолият юритмаганини билдирган.
