Германиянинг Иорданиядаги ҳарбий базаси Эрон ракеталари зарбасига учради — Spiegel
Немис ҳарбийлари жойлашган казармалар зарбага учраган, улар ҳужум пайтида бошпаналарда бўлган, ҳеч ким жабрланмаган.
Эрон ҳудудидан учирилган баллистик ракеталар 8-9 март кунлари Иорданиядаги Ал-Азрақ авиабазасининг Германия секторига ҳужум чоғида қулади. Бу ҳақда Spiegel нашрига таяниб, BBC хабар берди.
Нашр маълумотига кўра, немис ҳарбийлари жойлашган казармалар зарбага учраган, улар ҳужум пайтида бошпаналарда бўлган, ҳеч ким жабрланмаган. Худди шу авиабазада АҚШ ҳарбий-ҳаво кучлари ҳам жойлашган.
“Ракеталарнинг ўзи казармаларга тегдими ёки уларга ҳаво ҳужумидан мудофаа томонидан уриб туширилган ракета қолдиқлари тушдими, ҳозирча аниқ эмас”, дейилади хабарда.
Қайд этилишича, Германия ҳарбий контингенти бир неча йиллардан бери Ал-Азрақда доимий равишда жойлаштирилган, бироқ АҚШ ва Исроилнинг Эронга қарши уруши бошланганидан кейин шахсий таркиб қисқартирилган.
