Оролнинг қуриган тубида чўл ўсимликлари экиш тадбирлари бошланди
Ушбу тадбирларни сифатли амалга ошириш мақсадида Қорақалпоғистон Республикаси ва барча вилоятлардан жами 730 та техника ва механизмлар, 2 та АН-2 самолёти, 622 нафар ўрмон хўжалиги ишчилари ва механизаторлар жалб этилган.
Қорақалпоғистон Республикасининг Мўйноқ туманида – Орол денгизининг қуриган тубида саксовул экиш ишларига старт берилди.
Шу муносабат билан ташкил этилган тадбирда Ўзбекистон Республикаси Президентининг экология масалалари бўйича маслаҳатчиси – Экология ва иқлим ўзгариши миллий қўмитаси раиси А. Абдуҳакимов, Президентнинг Оролбўйи минтақасини барқарор ривожлантириш масалалари бўйича маслаҳатчиси Т. Худайбергенов, Ўрмон агентлиги директори Э. Муҳиддинов, Фавқулодда вазиятлар вазирининг биринчи ўринбосари С. Зуфаров, Қорақалпоғистон Республикаси Жуқорғи Кенгеси масъуллари, ўрмончилар, экологлар ҳамда кенг жамоатчилик вакиллари иштирок этди.
Айтиш ўринлики, Давлат раҳбарининг бевосита ташаббуси билан Орол денгизининг қуриган тубида 2018-2025 йиллар давомида 2 млн гектар майдонда “яшил қоплама” – ҳимоя ўрмонзорлари барпо этилди. Ушбу ўрмон-мелиоратив тадбирлари учун 7,8 минг тонна саксовул, қорабуроқ, черкез, қандим каби чўл ўсимликларининг уруғи жамғарилди.
Ҳар йили ўртача 1000 тагача техника ва механизмлар, 4 та самолёт, 2 та мотоделтаплан жалб этилди. Экиш тадбирларида 2 минг нафардан зиёд аҳоли, ишчи-ходим ва механизаторлар иштирок этди. Келгусидаги ўрмон барпо этиш ишлари учун йилига 100 гектардан кам бўлмаган майдонларда саксовул ниҳолхоналари ташкил этилди.
Тадбирда сўз олган Экология қўмитаси раиси А. Абдуҳакимов кейинги йилларда Оролнинг қуриган тубида чўлланишнинг олдини олиш, иқлим ўзгаришларининг салбий оқибатларини юмшатиш, биологик хилма-хилликни сақлаш ҳамда экотизимларни мустаҳкамлаш борасида амалга оширилаётган ишларни эътироф этди.
“Оролнинг қуриган тубида амалга оширилган барча ишлар мамлакатимизда экологик муҳитнинг яхшиланишига хизмат қилмоқда. Бу ерда, шундай шароитда чўл ўсимликлари экиш тадбирларида қатнашиш барча иштирокчилар, айниқса, ёшлар учун катта бахт. Аҳамиятлиси, экологик нуқтайи назардан олиб қаралганда, Орол ҳудудида қилинган бу ишлар бугун ўзининг самарасини кўрсатмоқда, келгусида ҳам бу тадбирлар изчил давом эттирилади, ” – деди А. Абдуҳакимов.
Таъкидлаш жоизки, жорий йилда ҳам бу тадбирларни сифатли амалга ошириш мақсадида Қорақалпоғистон Республикаси ва барча вилоятлардан жами 730 та техника ва механизмлар, 2 та АН-2 самолёти, 622 нафар ўрмон хўжалиги ишчилари ва механизаторлар жалб этилган.
Шу кунларда Орол денгизининг қуриган тубида чўл ўсимликлари экиш тадбирлари қизғин давом этмоқда.
