Сурхондарёда мактаб ўқитувчиси катта миқдорда наркотик модда сотаётганда қўлга олинди

Тожикистондан ноқонуний олиб кирилган жами 77 килограммдан ортиқ наркотик модда мусодара қилинди. Бу ҳақда Zamon.uz'га ДХХ хабар берди.

 

Маълум қилинишича, тегишли давлат органлари томонидан ўтказилган операцияда Тожикистондан контрабанда йўли билан олиб кирилаётган йирик миқдордаги гиёҳванд моддалар тўхтатиб қолинган.

 

Хусусан, Ўзбекистон–Тожикистон давлат чегарасининг Ховос тумани Шарқобод маҳалласи ҳудудидан ўтувчи қисмида тожикистонлик наркокурьерлар томонидан чегарадаги сим тўсиқ орқали улоқтирилган 6 та сумкани қабул қилиб олаётган пайтда икки нафар маҳаллий фуқаро қўлга олинган. Сумкалардан 8 кг 314 грамм героин ва 54 кг 458 грамм опий топилган.

 

Мазкур ҳолат юзасидан гумонланувчиларга нисбатан Жиноят кодексининг 246-моддаси 2-қисми ҳамда 25, 273-моддаси 5-қисми билан жиноят иши қўзғатилиб, уларга нисбатан қамоқ эҳтиёт чораси қўлланилган.

 

Шунингдек, Сурхондарё вилоятида ҳам наркотик моддалар савдосига оид яна бир ҳолат фош этилди. Сариосиё туманида ўтказилган тезкор тадбирда маҳаллий мактаблардан бирида ўқитувчи бўлиб ишловчи фуқаро 14 кг 680 грамм опий моддасини 180 минг АҚШ долларига сотаётган вақтида ашёвий далиллар билан қўлга олинган.

 

Тергов маълумотларига кўра, ушбу наркотик моддалар ҳам тожикистонлик наркокурьерлар томонидан етказиб берилган.

 

Гумонланувчига нисбатан Жиноят кодексининг 273-моддаси 5-қисми билан жиноят иши қўзғатилиб, унга нисбатан ҳам қамоқ эҳтиёт чораси қўлланган. Ҳозирда унинг эҳтимолий жиноий шерикларини аниқлаш бўйича тезкор-тергов ҳаракатлари давом этмоқда.