Тожикистон Президенти Эрон олий раҳбарига табрик йўллади
Имомали Раҳмон Россия Президенти Владимир Путин ва Озарбайжон Президенти Илҳом Алиевдан кейин Мужтабо Хоманаийни табриклаган учинчи давлат раҳбари бўлди.
Тожикистон президенти Имомали Раҳмон Мужтабо Хоманаийни Эрон Ислом Республикасининг янги олий раҳбари этиб сайлангани билан табриклади. Бу ҳақда Тожикистон президенти матбуот хизмати маълум қилди.
Табрик мактубида Имомали Раҳмон Эрон халқининг мамлакат олдида турган мураккаб синовларни янги раҳбар бошчилигида енгиб ўтишига ишонч билдирган.
Шунингдек, Тожикистон етакчиси Эроннинг минтақавий ҳамда глобал миқёсда тинчлик ва барқарорликни мустаҳкамлашдаги ролини юқори баҳолаб, икки давлат ўртасидаги ҳамкорликни ўзаро ишонч ва ҳурмат тамойиллари асосида янада ривожлантиришга тайёр эканини ҳам таъкидлаган.
Имомали Раҳмондан аввал Россия Президенти Владимир Путин ва Озарбайжон Президенти Илҳом Алиев ҳам Мужтабо Хоманаийни табриклаган эди.
9 март куни Эроннинг 88 нафар аъзодан иборат Экспертлар кенгаши Мужтабо Хоманаийни мамлакатнинг янги олий раҳбари этиб сайлаган эди. У сиёсий ва ижтимоий масалаларда тажрибага эга диний арбоб сифатида таърифланмоқда.
Шундан сўнг Ислом инқилоби қўриқчилари корпуси янги раҳбарга содиқлик қасамёдини қабул қилгани билдирилди.
