Трамп ва Путин Эрондаги урушни якунлаш масалаларини кўриб чиқди
Украинадаги вазиятни ҳал қилиш бўйича ҳам музокара ўтказилган.
АҚШ Президенти Доналд Трамп душанба куни Россия Президенти Владимир Путин билан телефон орқали гаплашди ва суҳбатда Эрон уруши ҳамда Украина можаросини якунлаш бўйича ҳаракатлар муҳокама қилинди. Бу ҳақида Кремлга таяниб Axios хабар бермоқда.
Россия президентининг ёрдамчиси Юрий Ушаковнинг сўзларига кўра, давлат раҳбарлари мулоқотида Эрон атрофидаги можаро ва Украинадаги вазиятни ҳал қилиш бўйича музокараларга урғу берилган.
Суҳбат АҚШ президенти ташаббуси билан бўлиб ўтган. Икки мамлакат президентлари Эрондаги вазият юзасидан батафсил фикр алмашган.
Телефон суҳбати давомида Путин Эрондаги можарони тезроқ сиёсий-дипломатик йўл билан ҳал қилишга қаратилган қатор мулоҳазаларини билдирган. Шу билан бирга, Россия раҳбари АҚШ ва шахсан Трампнинг Украина можаросини ҳал қилишдаги воситачилик саъй-ҳаракатларини ижобий баҳолашини қайд этган.
Қўшма Штатлар президентининг сўзларига кўра, суҳбат чоғида Путин Яқин Шарқдаги вазиятни тартибга солишга кўмаклашишга тайёрлигини билдирган. Украина мавзусининг муҳокамаси ҳам ижобий тарзда ўтказилган.
Аввалроқ Россия президентининг матбуот котиби Дмитрий Песков Яқин Шарқдаги уруш Москванинг уруши эмаслигини ва уни фақат бошлаган одам тўхтатиши мумкинлигини айтган эди.
