Ўзбекистонда икки ой ичида 45 та жиноий гуруҳ фаолияти тўхтатилди
Шунингдек, 3150 та жиноят иши қўзғатилган, 2934 нафар шахс маъмурий жавобгарликка тортилган ва 980 нафар шахсга қамоқ эҳтиёт чораси тайинланган.
2026 йилнинг январ ва феврал ойларида криминоген вазиятни барқарорлаштириш бўйича кенг кўламли тезкор тадбирлар ўтказилиши натижасида 45 та жиноий гуруҳ фаолиятига чек қўйилди. Бу ҳақда ИИВ маълум қилди.
Маълумотларга кўра, тадбирлар давомида 116 та товламачилик, 315 та ноқонуний қурол сақлаш, 86 та қиморхона фаолияти ва 40 та одам савдоси каби жиноятлар аниқланган. Шунингдек, 790 та ОИВ инфекциясини тарқатиш, фоҳишахона ташкил этиш каби жиноятлар ҳам фош қилинган. Қидирувда бўлган 533 нафар шахс ушланиб, уларга нисбатан жазо чоралари қўлланилган.
Январ-феврал ойларида жами 3150 та жиноят иши қўзғатилган, 2934 нафар шахс маъмурий жавобгарликка тортилган ва 980 нафар шахсга қамоқ эҳтиёт чораси тайинланган.
Қайд этилишича, ноқонуний қуроллар билан боғлиқ 315 та иш давомида 4570 та совуқ қурол мусодара қилинган. Жумладан 50 та бита, 72 та кастет, 4004 та ўткир тиғли жисм ва 444 та бошқа турдаги қурол. Шу билан бирга, 5814 дона ўқ-дори ва 3,715 килограмм портловчи моддалар далилий ашёлар сифатида олинган.
Ижтимоий тармоқларда жиноятчиликка ундовчи ва ёшлар орасида бузғунчи ғояларни тарғиб қилувчи 47 та аккаунт ҳам блокланган.
Шунингдек, Ички ишлар вазирлиги вакиллари жиноятчиликнинг барча кўринишларига қарши қатъий чоралар кўрилаётгани ва жамиятда хавфсиз ва соғлом муҳитни таъминлаш ишлари давом этаётганини таъкидлади.
