2026 йилда кимё саноатида 9,5 млрд долларлик 133 та лойиҳа амалга оширилади
Президент Шавкат Мирзиёев раислигида кимё саноатидаги йирик инвестиция лойиҳаларини жадаллаштириш масалалари муҳокама қилинди.
Шавкат Мирзиёев 11 март куни кимё саноатида йирик инвестиция лойиҳаларини амалга ошириш ҳамда янги ишлаб чиқариш қувватларини ишга тушириш бўйича олиб борилаётган ишлар юзасидан тақдимот билан танишди.
Танқидий руҳда ўтган йиғилишда тармоқни “мақсад – ҳаракат – натижа” тамойилига асосланган янги стратегик режалаштириш тизими асосида ривожлантириш зарурлиги таъкидланди. Кимё маҳсулотлари ишлаб чиқариш ҳажмини ошириш, янги қувватларни ишга тушириш ҳамда экспорт салоҳиятини кенгайтириш бўйича аниқ вазифалар белгиланди.
Жорий йилда кимё саноати маҳсулотлари экспортини 720 миллион долларга етказиш режалаштирилган. Қишлоқ хўжалигини зарур ўғитлар билан таъминлаш мақсадида 1,12 миллион тонна азотли, 135 минг тонна фосфорли ва 222 минг тонна калийли ўғит ишлаб чиқариш вазифаси қўйилди.
Маълум қилинишича, 2026 йилда тармоқ ва ҳудудларда 9,5 миллиард долларлик 133 та лойиҳа амалга оширилади ҳамда 2,5 миллиард доллар инвестиция жалб этилади. Шу жумладан, 24 та стратегик лойиҳа доирасида 7 та янги ишлаб чиқариш қуввати ишга туширилади.
Йиғилишда Қўнғирот сода заводи, Самарқандкимё ҳамда Деҳқонобод калий заводидаги лойиҳаларнинг амалга оширилиши танқидий кўриб чиқилиб, муддатларни тезлаштириш бўйича топшириқлар берилди.
Шунингдек, Аммофос‑Максам корхонасида тўпланган фосфогипс чиқиндиларини қайта ишлаш ва ундан қўшимча маҳсулотлар, жумладан сульфат кислотаси ишлаб чиқариш имкониятларидан самарали фойдаланиш масалалари муҳокама қилинди.
Кимё саноатини ривожлантириш доирасида Жанубий Корея компаниялари билан ҳамкорликда кимё-технология инновация марказини ташкил этиш режалаштирилмоқда. Ушбу марказ газ ва кўмир кимёси, нано ва композит материаллар, катализаторлар ҳамда бошқа йўналишларда илмий тадқиқотлар олиб борадиган Марказий Осиёдаги етакчи илмий платформага айланиши кутилмоқда.
Бундан ташқари, Фарғонаазот ва Навоиязот корхоналарида ишлаб чиқариш қувватларини модернизация қилиш, маиший кимё маҳсулотлари ҳамда янги турдаги шиналар ишлаб чиқариш лойиҳаларининг бориши ҳақида маълумот берилди.
Йиғилишда Ўзкимёсаноат тизимида рақамлаштиришни кенгайтириш, ЭРП тизимини жорий этиш ва сунъий интеллект технологияларидан фойдаланиш орқали тармоқ самарадорлигини ошириш масалалари ҳам кўриб чиқилди. Энергияни тежаш ва харажатларни оптималлаштириш орқали маҳсулот таннархини 10–15 фоизгача камайтириш вазифаси қўйилди.
Якунда давлат раҳбари кимё саноатидаги йирик инвестиция лойиҳаларини жадаллаштириш, муаммоли масалаларни тезкор ҳал этиш ҳамда янги ишлаб чиқариш қувватларини белгиланган муддатларда ишга тушириш бўйича мутасаддиларга тегишли топшириқлар берди.
