72 нафар Ўзбекистон фуқароси АҚШдан депортация қилинди
Доналд Трамп АҚШ президенти бўлгандан буён 1000 нафардан ортиқ ўзбекистонлик депортация қилинган.
Бугун Қўшма Штатлар Ўзбекистонга депортация рейсини амалга ошириб, мамлакатда қолиш учун қонуний рухсатга эга бўлмаган 72 нафар Ўзбекистон фуқаросини қайтариб юборди. Бу ҳақда АҚШнинг Ўзбекистондаги элчихонаси маълум қилди.
Қайд этилишича, мазкур парвоз Қўшма Штатларнинг ўз чегаралари хавфсизлигини таъминлаш борасидаги саъй-ҳаракатлари доирасидаги навбатдаги тадбирлардан бири ҳисобланади.
“Президент Трамп лавозимга киришганидан буён Қўшма Штатлар ноқонуний иммиграцияга чек қўйишга ҳамда ўз чегаралари ва фуқароларини ҳимоя қилишга қаратилган ўз мажбуриятлари доирасида 1000 дан зиёд Ўзбекистон фуқаросини депортация қилди”, дейилади хабарда.
Шунингдек, элчихона Қўшма Штатлар ҳудудига ноқонуний кирган шахслар қамоқ жазосига тортилишини ва мамлакатдан чиқариб юборилишини таъкидлаган.
Шунингдек, хабарда АҚШнинг депортация тадбирларини ўтказишда яқиндан ҳамкорлик қилаётгани учун Ўзбекистон ҳукуматига ўзининг чуқур миннатдорлигини билдириши қайд этилган.
