АҚШ Эронга қарши операцияга кунига 900 млн доллар сарфламоқда
Оқ уй яқин кунларда АҚШ Конгрессидан қўшимча мудофаа бюджети сўраши кутилмоқда.
АҚШ томонидан Эронга қарши олиб борилаётган ҳарбий операциялар учун кунига тахминан 900 миллион доллар сарфланмоқда. Бу ҳақда АҚШ Сенатидаги кўпчилик етакчиси John Thune маълум қилди, дея хабар бермоқда Interfaks.
Унинг сўзларига кўра, операция катта маблағ талаб қилаётганига қарамай, АҚШ қўшинлари ўз олдига қўйилган мақсадларга эришмоқда.
“Бу сезиларли харажат, бироқ биз яхши ҳолатдамиз. Олдимизга қўйилган вазифалар бажарилмоқда. Бу муҳим миссия ва умид қиламанки, у тез орада якунига етади”, — деган Thune.
Аввалроқ халқаро оммавий ахборот воситалари АҚШ томонидан Эронга қарши дастлабки ҳарбий зарбалар доирасида ўқ-дорилар учун 5,6 миллиард доллар сарфлангани ҳақида хабар берган эди.
Шунингдек, Оқ уй яқин кунларда ҳарбий операцияларни молиялаштириш учун ўнлаб миллиард долларга тенг қўшимча мудофаа бюджети ажратишни сўраб, АҚШ Конгрессига мурожаат қилиши кутилмоқда.
