АҚШ Исроилдан Эрондаги нефть ва энергетика объектларига зарба бермасликни сўради
Сўровнинг сабабларидан бири сифатида Трампнинг уруш тугагандан кейин Венесуэладаги каби Эрон нефть сектори билан ҳамкорликни йўлга қўймоқчилиги келтирилган.
АҚШ Исроилдан Эроннинг энергетика объектлари, айниқса нефть инфратузилмасига зарбаларни тўхтатишни “юқори сиёсий даражада” сўради. Бу ҳақда сўровдан хабардор учта манбага таяниб Axios маълумот берди.
7 март куни Исроил ҳаво кучлари Теҳрон ва қўшни Караж шаҳридаги нефть омборларига зарбалар берди. Натижада Эрон пойтахтида нефть базаларидаги ёнғинлар натижасида ҳосил бўлган ифлослантирувчи заррачалар сабаб “қора ёмғир” кузатилди.
Исроил расмийларидан бирига кўра, АҚШ Эроннинг нефть объектларига режалаштирилаётган ҳар қандай зарба ҳақида олдиндан огоҳлантиришни сўраган. Президент Доналд Трамп маъмурияти Исроил бундай зарбаларни тўхтатиши кераклигининг учта сабабини келтирган.
Биринчидан, улар асосий қисми Эрон ҳукуматига қарши бўлган фуқароларга ҳам зарар етказади; иккинчидан, Трамп Венесуэладаги каби уруш тугаганидан кейин Эрон нефть сектори билан ҳамкорликни йўлга қўймоқчи; учинчидан, бундай ўққа тутишлар Теҳроннинг Форс кўрфази мамлакатларидаги энергетика инфратузилмасига кенг кўламли жавоб ҳужумларини келтириб чиқариши мумкин.
Аxios'нинг ёзишича, бу Эронга қарши уруш бошланганидан бери АҚШнинг Исроил ҳарбий ҳаракатларини биринчи марта чеклаши ҳисобланади
“Трампнинг илтимоси юқори сиёсий даражада, шунингдек, алоҳида Исроил армияси бош штаби бошлиғи Эял Замирга етказилди”, деди Исроил расмийларидан бири.
Трамп Эрон энергетика ва нефть объектларига зарба беришни “охирги чоралар” сценарийси сифатида кўриб чиқмоқда. Агар Эрон биринчи бўлиб АҚШ иттифоқчиси бўлган араб давлатларининг нефть инфратузилмасига ҳужум қилса, жавоб зарбалари берилади.
Шу билан бирага АҚШ Эрон нефть объектларига янги зарбалар серияси жаҳон хомашё нархининг янада ошишига олиб келишидан хавотирда.
