Фарғонада ҳужра ташкил қилиб, болаларга диний таълим бераётган шахс ушланди
Ҳужрада 6–14 ёшдаги 17 нафар бола ноқонуний тарзда таълим олаётгани аниқланган.
Фарғона вилоятида ноқонуний диний таълим берилган яширин ҳужра фаолияти аниқланиб, уни ташкил этган шахс қўлга олинди. Бу ҳақда Фарғона вилояти Ички ишлар бошқармаси матбуот хизмати хабар берди.
Маълум қилинишича, Давлат хавфсизлик хизмати ҳамда ички ишлар органлари ходимлари ҳамкорлигида ўтказилган тезкор тадбир давомида ноқонуний диний таълим бериш билан боғлиқ ҳолат фош этилган.
Текширувлар давомида яширин ҳужрада 6 ёшдан 14 ёшгача бўлган 17 нафар бола таълим олаётгани аниқланган. Болаларнинг 14 нафари Қўқон шаҳридан, қолганлари эса республиканинг бошқа ҳудудларидан келгани маълум бўлган.
Шунингдек, ота-оналар фарзандларини ушбу ҳужрада ўқитиш учун ташкилотчига ойига 100–150 АҚШ доллари миқдорида тўлов қилиб келгани аниқланган.
Ҳозирда мазкур ҳолат юзасидан фуқарога нисбатан Ўзбекистон Республикаси Жиноят кодексининг 229-2-моддаси асосида ҳужжатлар расмийлаштирилиб, суриштирув ишлари олиб борилмоқда.
