Хитой Тожикистон–Афғонистон чегарасида 9 та чегара иншооти қуради
Лойиҳа қиймати 550 миллион сомонийдан ортиқ бўлиб, маблағ тўлиқ Хитой томонидан қопланади.
Хитой ҳукумати Тожикистон ва Афғонистон чегараси ҳудудида тўққизта чегара иншооти қуришни режалаштирмоқда. Бу ҳақда Asia Plus нашри хабар берди.
Мазкур келишув лойиҳаси 4 март куни Тожикистон парламенти йиғилишида кўриб чиқилиб, тасдиқланди.
Маълум қилинишича, лойиҳа Тожикистон чегара қўшинларининг моддий-техник базасини мустаҳкамлашга қаратилган. Қурилиш ишлари уч босқичда амалга оширилади.
Тожикистон Миллий хавфсизлик давлат қўмитаси (МХДҚ) раиси биринчи ўринбосари Муродали Раҷабзода парламент мажлисида маълум қилишича, лойиҳанинг иккинчи босқичи бўйича алмашинув хатлари аллақачон имзоланган.
Унга кўра, қуриладиган чегара иншоотларининг умумий майдони 17 109 квадрат метрни ташкил этади. Қурилиш харажатлари тахминан 569 миллион сомоний (424 миллион 830 минг Хитой юани)ни ташкил этиб, ушбу маблағ Хитой ҳукумати томонидан қопланади.
Келишувга мувофиқ, Тожикистон томони лойиҳа доирасидаги қурилиш ишларини солиқлар, божхона тўловлари ва бошқа мажбурий йиғимлардан озод қилиш учун масъул бўлади.
Ҳозирча мазкур чегара иншоотлари аниқ қайси ҳудудларда барпо этилиши ва уларнинг тури қандай бўлиши ҳақида расмий маълумот берилмаган.
