Қирғизистонга яширинча олиб кетилаётган 2,1 млрд сўмлик олтин қуймалар тўхтатиб қолинди
Олтин қуймаларни машинанинг кузов қисмига яшириб, олиб ўтишмоқчи бўлган.
Фарғона вилоятида олтин қуймаларнинг ноқонуний равишда Қирғизистонга олиб чиқилишининг олди олинди. Бу ҳақда Давлат хавфсизлик хизмати Zamon.uz'га хабар берди.
Маълум қилинишича, тезкор тадбир давомида Фарғона туманида яшовчи фуқаро бошқарувидаги Damas русумли автомобиль Қирғизистонга чиқиш мақсадида “Водил-авто” чегара божхона постига кириб келган вақтда текширувдан ўтказилган.
Текширув натижасида автомобиль кузов қисми ичига яширилган 4 дона ностандарт шаклдаги олтин қуйма борлиги аниқланиб, улар ашёвий далил сифатида расмийлаштириб олинган.
Экспертиза хулосасига кўра, олтин қуймаларнинг соф оғирлиги 1 килограмм 232 грамм бўлиб, умумий қиймати 2 млрд 182 млн 466 минг сўмни ташкил этади.
Мазкур ҳолат юзасидан ушбу шахсга нисбатан Жиноят кодексининг 182-моддаси (божхона тўғрисидаги қонунчиликни бузиш) 2-қисми “а” банди билан жиноят иши қўзғатилиб, тергов ҳаракатлари олиб борилмоқда.
