Исроилда ракета ҳужуми оқибатида 62 ёшли ўзбекистонлик эркак ҳалок бўлди
У сўнгги 14 йил давомида Исроилда яшаб келган ва ушбу давлат фуқароси ҳисобланган.
Исроилнинг Йехуд шаҳрида жорий йилнинг 9 март куни содир бўлган ракета ҳужуми натижасида 62 ёшли ўзбекистонлик эркак ҳалок бўлди. Бу ҳақда Ўзбекистоннинг Исроилдаги элчихонаси хабар берди.
Марҳум Р.Ғ. Ўзбекистонда туғилиб вояга етган ва 2017 йилда Ўзбекистон фуқаролигидан чиққан. У сўнгги 14 йил давомида Исроилда яшаб келган ва ушбу давлат фуқароси ҳисобланган. Элчихона марҳумнинг оила аъзолари ва яқинларига чуқур ҳамдардлик билдирди.
11 март ҳолатига кўра, Исроилда бўлган бошқа ўзбекистонликлар орасида жароҳат олганлар ҳақида элчихонага хабар келмаган.
Элчихона Исроил ҳудудида вазият кескинлигича сақланиб қолаётганини инобатга олиб, мамлакатда вақтинча меҳнат фаолиятини олиб бораётган ёки доимий яшаб келаётган барча ватандошларни огоҳлантириш сигналларига жиддий муносабатда бўлишга, хавфсизлик талаб ва қоидаларига қатъий риоя қилишга чақирди.
