Платформа яратиш учун ўтказилган тендерда қатнашган компаниялар бир шахсга тегишли бўлиб чиқди
Ногиронлиги бўлган шахсларга тиббий-ижтимоий ёрдам кўрсатиш платформасини яратиш жараёнида шубҳали давлат хариди ўрганилди
ОАВ ва ижтимоий тармоқлардаги тарқалган хабарлар асосида, ПФ-87-сон Президент фармонига мувофиқ, ногиронлиги бўлган шахсларга тиббий-ижтимоий ёрдам кўрсатиш масалалари юзасидан давлат органларига онлайн мурожаат қилиш платформасини яратиш жараёни Коррупцияга қарши курашиш агентлиги томонидан ўрганилгани маълум қилинди.
Маълум қилинишича, топшириқ ижросига масъул Тиббий-ижтимоий хизматларни ривожлантириш агентлиги бўлиб, платформани ишлаб чиқиш бўйича 2022 йил 14 ноябрда бошланғич нархи 737 млн сўмлик танлов ўтказилган.
Давлат харидида “Э.” МЧЖ 710 млн сўмлик таклиф билан ғолиб чиқган, ягона рақиб сифатида иштирок этган “И.” МЧЖ эса захира ғолиб деб топилган. Ўрганиш давомида мазкур икки талабгор ҳужжатлари бир хил қурилма ва ИП-манзилдан юклангани аниқланган.
Шунингдек, платформанинг App Сторедаги мобил иловасининг ишлаб чиқарувчиси сифатида “И.У” жамоат бирлашмаси қайд этилган бўлиб, бирлашма таъсисчиси Б.С.С. захира ғолиб “И.” МЧЖнинг ягона раҳбари ва таъсисчиси эканлиги маълум бўлган.
Бундан ташқари, буюртмачи 710 млн сўм маблағни “Э.” МЧЖга тўлаб берган, лекин у жорий харажат сифатида ҳисобга олинган ва платформани балансга қабул қилиш чораси кўрилмаган.
Юқоридаги ҳолатлар бўйича тўпланган ҳужжатлар ҳуқуқни муҳофаза қилувчи органларга қонуний чоралар кўриш мақсадида юборилди.
