Тошкентда талабалар ва уй эгаси ўртасида ижара пули сабаб жанжал юз берди
Ҳозирда ҳолат юзасидан қонуний чора кўриш масаласи кўриб чиқилмоқда ҳамда ҳужжатларни туман судига юбориш режалаштирилган.
Тошкент шаҳрининг Сергели туманида ижара ҳақи бўйича келишмовчилик сабаб юзага келган жанжал юзасидан Тошкент шаҳар ИИББ расмий маълумот берди.
Маълум қилинишича, 10 март куни Сергели тумани ИИО ФМБ навбатчилик қисмига Сергели-7 мавзесидаги кўп қаватли уйлардан бирида ижарада яшаб келаётган Тошкент давлат юридик институти талабалари ҳамда улар билан бирга яшовчи фуқаро ўртасида жанжал келиб чиққани ҳақида хабар келиб тушган.
Ҳолат юзасидан барча иштирокчиларнинг шахси аниқланиб, Сергели тумани ички ишлар бўлимида тегишли ҳужжатлар расмийлаштирилган. Шунингдек, жанжал иштирокчилари билан профилактик суҳбат ўтказилиб, улар уйларига жавоб берилган.
Ҳозирда тўпланган материаллар юзасидан қонуний чора кўриш масаласи кўриб чиқилмоқда ҳамда ҳужжатларни туман судига юбориш режалаштирилган.
