Сирдарёда кадастр ходими 1500 доллар пора билан қўлга тушди
У фуқаронинг кадастр ҳужжатларини расмийлаштириш ва муддатидан олдин тайёрлаб бериш эвазига пул талаб қилган.
Кадастр агентлигининг Сирдарё вилояти Мирзаобод тумани бўлими бош инспекторига нисбатан жиноят иши қўзғатилди. Бу ҳақда ДХХ Zamon.uzга хабар берди.
Маълум қилинишича, мансабдор шахс хизмат мавқеидан фойдаланган ҳолда 1975 йилда туғилган фуқаронинг ишончига кириб, унинг яшаш уйи бўйича кадастр ҳужжатларини расмийлаштириб бериш ҳамда уларни муддатидан олдин тайёрлаб беришни ваъда қилган. Бунинг эвазига у 1500 АҚШ доллари талаб қилган.
Давлат хавфсизлик хизмати ҳамда Бош прокуратура ҳузуридаги Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбир давомида бош инспектор 1000 АҚШ доллари ва 6 миллион 50 минг сўм пул маблағини олаётган вақтида ашёвий далиллар билан ушланган.
Мазкур ҳолат юзасидан унга нисбатан Жиноят кодексининг 168-моддаси 3-қисми “в” банди ҳамда 28,211-моддаси 1-қисми билан жиноят иши қўзғатилиб, гумонланувчига нисбатан қамоқ эҳтиёт чораси қўлланилган.
Ҳозирда мазкур ҳолат юзасидан тергов ҳаракатлари давом этмоқда.
