Теҳрон Байрутда тўрт нафар эронлик дипломатнинг ўлдирилганини террорчилик ҳаракати сифатида баҳолади
Исроил ҳарбийлари Байрутдаги меҳмонхонада эронлик агентларнинг махфий учрашуви бўлиб ўтаётганидан хабардор бўлган.
Эроннинг БМТдаги элчиси Амир Саид Иравоний ўтган якшанба куни Байрутдаги “Рамада” меҳмонхонасига берилган зарба натижасида тўрт нафар эронлик дипломат ҳалок бўлганида Исроилни расман айблади. Бу ҳақда BBC хабар бермоқда.
Иравоний БМТ бош котиби Антонио Гутерришга йўллаган мактубида ҳужум дипломатлар ўз расмий қароргоҳларидан меҳмонхонага кўчиб ўтганидан кейин амалга оширилган “қасддан ва нишонга олинган ҳужум” бўлганини таъкидлаган.
“Бошқа суверен давлат ҳудудида хизмат қилаётган суверен давлат вакиллари бўлган тўрт нафар эронлик дипломатнинг нишонга олиниб ўлдирилиши жиддий террорчилик ҳаракати ҳамда халқаро ҳуқуқнинг қўпол бузилиши ҳисобланади”, дейилади мактубда.
Зарба Байрут марказидаги меҳмонхонанинг тўртинчи қаватига берилган. Исроил ҳарбийлари эса бинода эронлик агентларнинг махфий учрашуви бўлиб ўтаётганидан хабардор бўлган.
Исроил Мудофаа кучлари маълумотига кўра, зарба оқибатида ҳалок бўлган беш киши Эрон Ислом инқилоби қўриқчилари корпусининг хориждаги операцияларни амалга оширувчи элит бўлинмаси — “Қудс” кучларида ишлаган.
Ливан Соғлиқни сақлаш вазирлигининг дастлабки маълумотларига кўра, зарба натижасида 4 киши ҳалок бўлган, 10 киши жароҳатланган, бироқ уларнинг исмлари ҳозирча очиқланмаган.
