Тошкент вилоятида наркотик моддаларни сотишга уринган шахслар ҳибсга олинди
Операциялар натижасида 1 кг “гашиш” ва 1883 дона кучли таъсир қилувчи препарат мусодара қилинди.
Божхона қўмитаси Контрабандага қарши кураш департаменти ходимлари Давлат хавфсизлик хизмати вакиллари билан ҳамкорликда Тошкент вилоятида гиёҳванд моддалар ва кучли таъсир қилувчи препаратларнинг ноқонуний савдосига қарши бир қатор тезкор операциялар ўтказди. Ушбу тадбирлар натижасида наркотик моддаларни сотишга уринган бир неча шахс қўлга олинди ва улардан катта миқдорда модда мусодара қилинди.
Янгиёл туманида олдиндан кузатувга олинган фуқаро харидорга 1 кг 12 грамм “гашиш” гиёҳвандлик моддасини 13 000 АҚШ долларига сотишни келишиб олган. Ҳуқуқни муҳофаза қилувчи органлар томонидан шахс маҳаллий меҳмонхонада 1000 доллар олдиндан тўлов олаётган пайтда ҳибсга олинган. Тадбир давомида гиёҳванд модданинг тўлиқ миқдори далил сифатида мусодара қилинган.
Бошқа бир ҳолатда, Оҳангарон шаҳрида Божхона ва ДХХ ходимлари томонидан “Spark” русумли автомобиль тўхтатилиб, гувоҳлар иштирокида кўздан кечирилган. Юк хонани текшириш жараёнида автомобильнинг овоз тизими ичида 841 дона “Zardeks” ва 1042 дона “Regapen” номли кучли таъсир қилувчи дорилар топилган.
Тергув натижасида ушбу дорилар автомобилдаги уч йўловчига тегишли экани ва улар дориларни Оҳангаронда сотиш мақсадида олиб кетаяпганлиги аниқланган.
Ҳозирда иккала ҳолат бўйича жиноят ишлари қўзғатилган ва бутун таъминот занжирини аниқлаш ҳамда ҳуқуқий баҳолаш учун тергов ҳаракатлари давом этмоқда.
