Афғонистонда камида 12 та судсиз қатл ҳолати қайд этилган — БМТ
Шунингдек, 29 та ўзбошимчалик билан ҳибсга олиш ва 6 та қийноқ ҳолати ҳужжатлаштирилган.
Бирлашган Миллатлар Ташкилоти томонидан эълон қилинган янги чораклик ҳисоботда Афғонистонда инсон ҳуқуқлари билан боғлиқ қатор жиддий ҳолатлар қайд этилгани маълум қилинди. Бу ҳақда Tolo News нашри хабар берди.
Ҳисоботга кўра, 6 ноябрдан 25 январгача бўлган даврда мамлакатда собиқ ҳукумат амалдорлари ҳамда хавфсизлик кучлари вакилларига нисбатан камида 12 та судсиз қатл ҳолати аниқланган. Ушбу воқеаларда Толибон вакиллари билан бир қаторда номаълум шахслар ҳам иштирок этгани қайд этилган.
Шунингдек, БМТ мутахассислари томонидан 29 та ўзбошимчалик билан ҳибсга олиш ва 6 та қийноқ ҳамда ёмон муомала ҳолати ҳужжатлаштирилган.
Ҳисоботда айрим жабрланган шахслар мамлакатга қайтганидан сўнг ҳужумга учрагани ҳам алоҳида таъкидланган. Бундай ҳолатлар Толибон томонидан илгари эълон қилинган «умумий амнистия» сиёсатига қарамай давом этаётгани қайд этилиб, бу собиқ ҳукумат вакиллари хавфсизлиги ва ҳуқуқий ҳимояси борасида жиддий хавотирларни юзага келтирмоқда.
Инсон ҳуқуқлари ташкилотлари ушбу ҳолатлар юзасидан шаффоф ва мустақил тергов ўтказиш, шунингдек, айбдорларни жавобгарликка тортиш зарурлигини таъкидламоқда.
