АҚШнинг кейинги нишони Россия бўлади — Россия Коммунистик партияси раиси
Депутатнинг айтишича, Форс кўрфазида содир бўлаётган воқеалар Америка империализмининг ниқоблари олиб ташланганини кўрсатмоқда.
Россия Коммунистик партияси раиси Геннадй Зюганов АҚШнинг Яқин Шарқдаги ҳаракатларини “тажовуз, зўравонлик ва принципсизлик”, деб баҳолади. Зюганов бу ҳақда Давлат думаси йиғилишида маълум қилди.
Унинг айтишича, Яқин Шарқдаги уруш Трамп стратегиясининг бир қисми бўлиб Эрондан кейинги нишон Россия бўлади.
“Омон қолиш учун курашга келсак, ҳозир Эрон жанг қилмоқда. Кейингиси биз бўламиз. Трампнинг стратегиясига қаранг: биринчи ўринда Хитой, иккинчи ўринда биз, учинчи ўринда Эрон”, — деди Зюганов.
Депутатнинг сўзларига кўра, Форс кўрфазида содир бўлаётган воқеалар “Америка империализмининг ниқоблари олиб ташланганини” кўрсатмоқда.
“Тезкор ҳарбий ҳужум режаси муваффақиятсизликка учради. Улар эронликлар тезда қўлларини кўтаради ва ўз шартларимизни диктовка қиламиз деб умид қилишганди. Ҳеч бири ўхшамаяпти”, — деди у.
Зюганов урушнинг минтақа учун оғир оқибатларига тўхталиб, жанговар ҳаракатлар сувни чучуклаштириш қурилмалари ва инфратузилмаларнинг шикастланиши туфайли сув ва озиқ-овқат билан боғлиқ муаммоларга олиб келганини қайд этди.
