Бекободда 11-синф ўқувчисининг ўлими юзасидан 5 киши қамоққа олинди
Жабрланувчи пичоқланиш оқибатида вафот этган.
Бекобод шаҳрида жанжал оқибатида қотиллик юз бергани юзасидан 5 нафар вояга етмаган шахс қамоққа олинди. Бу ҳақда Бош прокуратура хабар берди.
Маълум қилинишича, 5 март куни Бекобод шаҳрида бир неча вояга етмаган шахслар ўртасида келиб чиққан оғзаки жанжал давомида улардан бири ошхона пичоғи билан жабрланувчининг ўнг ва чап кўкрак қисмларига жароҳат етказган.
Жабрланувчи тиббиёт муассасасига олиб борилган бўлса-да, кўрсатилган тиббий ёрдамга қарамасдан вафот этган.
Мазкур ҳолат юзасидан Жиноят кодексининг 97-моддаси (Қасддан одам ўлдириш) билан жиноят иши қўзғатилиб, вояга етмаган 5 нафар гумонланувчи шахсга нисбатан "қамоққа олиш" эҳтиёт чораси қўлланилган.
Тергов ҳаракатлари давом этмоқда.
