Электр энергиясидан фойдаланиш қоидаларини бузганлик учун жазо чоралари кучайтирилади

Ўзбекистонда 11- март куни имзоланган қонунга мувофиқ, Жиноят кодекси ҳамда Маъмурий жавобгарлик тўғрисидаги кодексга ўзгартириш ва қўшимчалар киритилди. 

 

Қонун расмий эълон қилинган кундан эътиборан 3 ой ўтгач кучга киради.

 

Маъмурий жавобгарлик тўғрисидаги кодексга киритилган ўзгартиришларга кўра, умумий фойдаланишдаги электр, иссиқлик, газ тармоқларига ўзбошимчалик билан уланиш ёки улардан фойдаланиш қоидаларини бошқача тарзда бузиш,

 

— жисмоний шахсларга БҲМнинг 15 бараваридан 20 бараваригача (6 млн 180 минг сўмдан 8 млн 240 минг сўмгача), 

 

— мансабдор шахсларга эса – 25 бараваридан 30 бараваригача (10 млн 300 минг сўмдан 12 млн 360 минг сўмгача) миқдорда жарима солишга сабаб бўлиши белгиланди.

 

Шунингдек, амалдаги таҳрирда фуқароларга БҲМнинг 10 бараваридан 15 бараваригача, мансабдор шахсларга эса – 20 бараваридан 25 бараваригача миқдорда жарима солиниши белгиланган.

 

Умумий фойдаланишдаги электр, иссиқлик, газ ёки водопровод тармоқларига тижорат мақсадларида ўзбошимчалик билан уланиш БҲМнинг 15 бараваридан 25 бараваригача (6 млн 180 минг сўмдан 8 млн 240 минг сўмгача) жарима ёки 15 суткагача муддатга маъмурий қамоққа олишга сабаб бўлиши белгиланди.

 

Амалдаги таҳрирда мазкур қоидабузарлилар учун жарима миқдори БҲМнинг 10 бараваридан 20 бараваригача миқдорда белгиланган.

 

Жиноят кодексига киритилган ўзгартиришларга мувофиқ, умумий фойдаланишдаги электр, иссиқлик, газ ёки водопровод тармоқларига ўзбошимчалик билан уланиш, шундай ҳаракат учун маъмурий жазо қўлланилганидан кейин содир этганлик БҲМнинг 30 бараваридан 75 бараваригача (12 млн 360 минг сўмдан 28 млн 840 минг сўмгача) миқдорда жарима ёки 240 соатгача мажбурий жамоат ишлари ёки бир йилгача ахлоқ тузатиш ишлари билан жазоланиши белгиланди.

 

Амалдаги таҳрирда жариманинг энг кам миқдори БҲМнинг 25 баравари этиб белгиланган.