Эрон режими қулаш хавфи остида эмас — АҚШ разведкаси
Эрон режимининг барқарорлиги сақланса, уруш АҚШ хоҳлагандек якунланмаслиги мумкин.
Reuters агентлигининг манбаларга таяниб хабар беришича, АҚШ разведкаси Эрон раҳбариятида барқарорлик сақлангани туфайли деярли икки ҳафта давомида АҚШ ҳамда Исроил томонидан узлуксиз амалга оширилган бомбардимонлардан кейин ҳам мамлакатда амалдаги режим сақланиб қолишини билдирган.
Агентлик суҳбатдошлари маълумотларига кўра, кўплаб разведка ҳисоботларида режим қулаш хавфи остида эмаслигига далиллар келтирилган.
Нефть нархининг тез ўсиши сабабли сиёсий босим кучайган бир пайтда, АҚШ президенти Доналд Трамп ушбу ҳафта "2003 йилдан бери энг йирик ҳарбий операцияни жуда тез орада якунлаймиз", деб баёнот берган эди.
Агентликнинг ёзишича, Эрон етакчилари барқарор қолаверса, урушни мақбул тарзда якунлаш қийин бўлиши мумкин.
Шунингдек, разведка хабарларида, 28 февралда, АҚШ ва Исроил зарбалари бошланганининг биринчи куни Эрон олий етакчиси Али Хоманаий вафот этганига қарамай, Эрон диний раҳбариятининг бирдамлиги алоҳида таъкидланган.
Ёпиқ музокараларда қатнашган Исроил расмийлари ҳам уруш диний ҳукуматнинг қулашига олиб келишига аниқ ишонч йўқлигини тасдиқлашган.
