Эроннинг Олий раҳнамоси Мужтабо Хоманаий илк бор халққа мурожаат қилди
Нутқ уруш, душманга қарши чоралар, репарация талаб қилиш ва қўшни давлатлардаги ҳарбий базаларни ёпишга чақиришга бағишланган.
12 март куни Эроннинг янги Олий раҳнамоси Мужтабо Хоманаий илк бор халққа мурожаат қилди. Мурожаат “Tasnim” ахборот агентлиги орқали тарқатилган ва Эрон телевидениесида ўқиб эшиттирилган, аммо Хоманаий кадрда кўриниш бермаган. У ўз тайинлангани ҳақида Экспертлар кенгашидаги овоз бериш жараёни орқали билганини айтган.
Хоманаий нутқининг марказий мавзуси уруш бўлган. У ҳарбийларга душманга берилган зарбалар учун миннатдорлик билдирган ва Эрон Ҳурмуз бўғозини ҳимоя қилишни давом эттиришини маълум қилган. Шунингдек, Яман ҳусийлари, “Ҳизбуллоҳ” ва Ироқ қаршилик кучларига кўрсатилган қўллаб-қувватлаш учун ташаккур билдирган.
Хоманаий ҳалок бўлган ҳар бир эронлик учун, жумладан Минобдаги қизлар мактабига берилган зарба учун қасос олишга ваъда берган. У Эрон душмандан репарация талаб қилишини, рад этилган тақдирда мулкни мусодара қилиш ёки шунга тенг қийматни йўқ қилишини огоҳлантирган. Қўшни давлатлардаги хорижий ҳарбий базаларга ҳам бевосита огоҳлантириш юборилиб, уларни иложи борича тезроқ ёпишга чақирган.
Нутқнинг ички сиёсий қисмида Хоманаий халқнинг Олий раҳнамосиз қолган кунларда давлатни бошқаришда ролини таъкидлаган, бирдамлик ва ўзаро ёрдамга чақирган.
