Россияда Crocus City Hall'га ҳужум қилганларга умрбод қамоқ жазоси тайинланди
2024 йилда Crocus City Hall'га уюштирилган террорчилик ҳужуми оқибатида камида 145 киши ҳалок бўлган эди.
Россия Ҳарбий суди Crocus City Hall'га ҳужум қилганликда айбланган шахсларни умрбод қамоқ жазосига ҳукм қилди. Бу ҳақда “ТАСС” агентлиги хабар бермоқда.
Маълумотларга кўра, жами 19 нафар судланувчидан 15 нафарига умрбод қамоқ жазоси тайинланган. Яна тўрт киши 22,5 йилгача қамоқ жазосига ҳукм қилинган. Улар орасида жиноятчиларга автомобиль ва квартира берганлар ҳам бор.
2024 йил 22 март куни Crocus City Hall'га уюштирилган террорчилик ҳужуми оқибатида камида 145 киши ҳалок бўлди, 550 дан ортиқ киши жароҳатланди, яна 1700 дан ортиқ киши мазкур ҳодисада жабрланувчи деб топилди.
Россия ҳукумати ИШИД террористик ташкилотининг Афғонистондаги бўлими бўлган "Хуросон вилояти" гуруҳи аъзоларини теракт содир этишда айблаган.
Россия расмийлари ва Кремлга алоқадор оммавий ахборот воситалари ҳам терактда "Украина изи" борлигини таъкидлаган, бироқ бунга далиллар келтирилмаган.
