Саккизта араб ва мусулмон давлатлари Исроилнинг Ал-Ақсо масжидини ёпишини қоралади

Қатар, Иордания, Индонезия, Туркия, Покистон, Саудия Арабистони, Миср ва БАА ташқи ишлар вазирлари мусулмонлар учун муқаддас Рамазон ойи давомида Ал-Ақсо масжидининг кетма-кет 12 кун ёпиб қўйилганини қоралади. Бу ҳақда Al Jazeera хабар берди.

 

Чоршанба куни эълон қилинган қўшма баёнотда саккизта араб ва мусулмон давлатларининг ташқи ишлар вазирлари Исроил томонидан Қуддуснинг қадимий шаҳрига ва у ердаги ибодат масканларига фаластинликларнинг киришига қўйилган чекловларни “халқаро ҳуқуқ, жумладан халқаро гуманитар ҳуқуқ, тарихий ва ҳуқуқий статус-кво ҳамда ибодат жойларига эркин кириш тамойилининг қўпол бузилиши” деб атади.

 

“Вазирлар ушбу ноқонуний ва асоссиз чорани қатъиян рад этишлари ҳамда қоралашларини билдиради. Шунингдек, Исроилнинг Ал-Ақсо масжиди / Ал-Ҳарам Ал-Шариф ҳудудидаги давом этаётган провокацион ҳаракатлари ва ибодат қилувчиларга қарши чораларини ҳам қоралайдилар. Улар Исроилнинг Қуддус ёки унинг исломий ва насроний муқаддас масканлари устидан суверенитетга эга эмаслигини таъкидлайди”, дейилади баёнотда.

 

Баёнотда яна Ал-Ақсо масжидини ҳудудининг тўлиқ қисми “фақат мусулмонлар учун” эканлиги қайд этилди. 

 

Шунингдек, Иордания Вақфлар ва Ислом ишлари вазирлигига қаршли Қуддус Вақфлари ва Ал-Ақсо масжиди ишлари бошқармаси мазкур муқаддас маскан устидан “ягона қонуний ваколатга эга ташкилот” экани таъкидланди.

 

Шу билан бирга, вазирлар Исроилни Ал-Ақсо масжидини яна очишга, Эски шаҳарга кириш бўйича чекловларни олиб ташлашга ҳамда мусулмонларнинг масжидга киришига тўсқинлик қилмасликка чақирди. 

 

Шунингдек, халқаро ҳамжамиятдан Исроилни “мазкур қонунбузарликларини” тўхтатишга мажбур қилиш сўралган.

 

Исроил кучлари эса масжидда ибодат қилиш ва  Эски шаҳар ҳудудига кириш бўйича қатъий чекловлар жорий этилганини давом этаётган Эронга қарши уруш фонида “хавфсизлик чораси” сифатида изоҳлаган.

 

Бироқ чоршанба куни Фаластин Ташқи ишлар вазирлиги ушбу ёпилиш давом этаётгани “фаластинликларнинг ҳуқуқларини очиқчасига бузиш сиёсатини” яна бир бор кўрсатаётганини маълум қилди. 

 

Ҳамас ҳам масжид ёпиб қўйилганини қоралаб, сешанба куни бу ҳолат “хавфли тарихий ҳодиса” ҳамда ибодат эркинлигининг “очиқдан-очиқ бузилиши” эканини билдирган.